हस्तकलाका निर्माता तथा व्यापारीहरूले आगामी वर्ष कोरोनाले थलिएको उद्योगलाई पुनरुत्थानका लागि समर्पित गर्ने घोषणा गरेका छन् । बिक्री र नयाँ निर्यात आदेशको अभावले आफ्नो जीविकोपार्जनका लागि यस क्षेत्रमा निर्भर हजारौं नेपालीहरूलाई समस्यामा पारेको छ।

 

नेपाल हस्तकला महासङ्घले आगामी वर्षलाई हस्तकला वर्षका रूपमा घोषणा गर्दै व्यवसाय प्रवद्र्धनका लागि काम गर्ने र नेपाली उत्पादनलाई अन्तर्राष्ट्रिय बजारमा पहुँचयोग्य र प्रतिस्पर्धी बनाउन नीति सुधारका लागि सरकारसँग लबिङ गर्ने आइतबार जनाएको छ ।

 

महासंघको ४८औँ वार्षिकोत्सव समारोहमा बोल्दै महासंघका अध्यक्ष सुरेन्द्रभाइ शाक्यले कोरोना महामारीबाट प्रभावित उद्योगलाई पुनःस्थापना गर्ने उद्देश्यले हस्तकला वर्ष मनाइएको बताए ।

 

उनले घट्दै गएको हस्तकला उद्योगको संरक्षण र प्रवद्र्धन गर्न संघ, प्रदेश र स्थानीय सरकारले सीपमूलक स्वरोजगार तालिम र राष्ट्रिय तथा अन्तर्राष्ट्रिय बजार व्यवस्थापन तालिम दिनुपर्ने बताए । सरकारी कार्यालयहरूले पनि नेपाली हस्तकलाका उत्पादनहरू प्रयोग गरेर उद्योगलाई आफ्नो खुट्टामा उभ्याउन सहयोग गर्नुपर्ने उनले बताए।

 

महासंघले स्वरोजगार सृजना गरी आत्मनिर्भर बन्ने स्पष्ट उद्देश्यलाई प्राथमिकता दिएर बजेट उपलब्ध गराउनुपर्ने बताएको छ ।

 

सञ्चार तथा सूचना प्रविधिमन्त्री पार्वत गुरुङले हस्तकलाको प्रवद्र्धन र निर्यातलाई प्रतिस्पर्धी बनाउन सरकार नीतिगत सुधार गर्न तयार रहेको बताए ।